Innlegg

Kapitaldag i Sogn og Fjordane

I forbindelse med Innovasjonsveka OPP vil vi gjerne invitere deg til arrangementet “Kapitaldag” hos Scandic Sunnfjord Hotel i Førde den 19. september kl. 10-15.30. Tema for dagen er innovasjon, kapital og vekst i næringslivet! 

Her møter du både spanande investormiljømiljø på Vestlandet, etablert næringsliv og oppstartselskap som søkjer kunnskap om eller finansiering av sine idear og prosjekter.

Har di bedrift behov for kapital til vidare vekst og kan vere ei interessant investering for ein investor? Det er plass til at utvalde bedrifter kan få pitche for investorane under arrangementet. Dette gjer du i påmeldingslenka.

Frist for å melde seg for pitch er 07.09.18!

Arrangørar er Innovasjon NorgeSogn og Fjordane NæringsrådNHO Vestland,Kunnskapsparken Sogn og Fjordane og Aksello.

Vi håpar å sjå deg der! 

Frukostsamling torsdag 6. september – Fjordkysten, Flora Hamn og Leif Stavøstrand si nye satsing

Aksello håpar alle har hatt ein fin sommar og ønsker velkommen til haustens første Frukostsamling, torsdag den 6. september. Frukost blir servert frå kl 07.30, og presentasjonar blir frå kl. 08.00 til 09.00.

Programmet, som denne gong vert dominert av kyst-tema, ser slik ut:

  • Fjordkysten – Kva skjer? Destinasjonsselskapet har vore gjennom ein endringsprosess, og vi er spente på å høyre kva Marita Solheim har å seie om status og framtida.
  • Flora Hamn – Framtidas hamn – viktige grep v/Hamnesjef Linda M. Midtbø
  • Ny inkubatorbedrift: Evoy AS v/Leif Stavøstrand. Evoy jobbar med båtar med elektrisk framdrift, og Leif har ymta frampå om «flere nyheter og en verdenspremiere», så her er det berre å følgje med.

Frukostsamlinga finn stad i Aksello sine lokaler i Magnus Thingnesgt. 1, 4.etasje (Kvartalet).

Innovasjon Norge vil som vanleg vere til stades heile dagen. Denne gongen kjem Jørgen Berg. Om du vil ha eit separat møte med Jørgen, så send ei melding til arne@aksello.no.

VELKOMMEN!

Påminning: Velkommen til «Lille Florø» under ONS 2018!

Neste vekes Offshore Northern Seas blir ein viktig møteplass for ein energibransje på full fart oppover att. Vi i Aksello legg til rette ein spanande arena i Vågen for kvelds-aktivitetar også i år.

Aksello vil med dette invitere deg til å nytte desse lokalitetane.

Vi tilbyr:

• Sentral plassering i Vågen med alt som skjer der (Aurora-konsert, Run for Fun, fyrverkeri og mykje anna).
• Stort telt med eige kjøkken og sitteplassar for 70-80 pax.
• Stor og koseleg hage utanfor teltet, med bord, planter, parasollar etc.
• Bistro To Kokker er på plass med ein førsteklasses sjømatbuffet.
• Trubadur Allan Madsen sørger for god musikk og stemning utover kvelden.

Store, lokale aktørar er allereie om bord, som Saga Fjordbase, PGS, Neptune Energy og Norske Shell.
Nytt høvet, du også! Hugs: Godt nettverksarbeid gir fleire kontraktar!

Sjå brosjyra her for meir informasjon!

For prisar og bestilling, kontakt arne@aksello.no

VELKOMMEN!

 

 

Gratis kontorplass til deg som vil starte di eiga bedrift i Flora kommune

Ynskjer du å starte di eiga bedrift eller har du ein forretningsidé som du drøymer om å sette ut i livet? Det er spennande og givande å vere gründer, men du møter også på mange utfordringar når du startar for deg sjølv.

Hos Aksello får du gratis rettleiing og svar på dei spørsmåla du lurer på. Vi hjelper deg mellom anna med å velje selskapsform, utvikle ein solid forretningsmodell og marknadsføringsstrategi, skaffe finansiering og setje deg i kontakt med dei rette personane.

Frå og med juni 2018 tilbyr Flora kommune gratis kontorplass hos Aksello til nye gründarar i kommunen. Tilbodet gjeld plass i opent kontorlandskap i inntil tre månader slik at du kan planlegge oppstarten av di bedrift. Vårt flotte lokale er opent 08.00-16.00 måndag til fredag, og er eit godt og sosialt nyskapingsmiljø der du får arbeide tett saman med din rettleiar og andre gründerar.

Aksello er Flora kommune sin førstelinjeteneste og vi hjelper deg i gang!

Kontakt oss

Det første møtet

–  For kvar einaste gode idé og prosjekt er det ein ting som er essensielt, og det er det første møtet: møtet mellom enkeltindivid. Det er mykje fantastisk som kan skje etter det.

Dette sitatet frå direktør Jan Olav Baarøy frå Fredskorpset runda torsdagens første møte, den månadlege samlinga hos Aksello, der dei frammøtte fekk bli betre kjend med Fredskorpset, Ungdomsbedrifta Green Plastic UB, den lokale og globale aktøren Norwell og inkubatorbedrifta Nekst.

Frukostsamling | Aksello
Elevane frå Green Plastic UB.

Green Plastic UB – status og vegen vidare

Ungdomsbedrifta Green Plastic UB, som nyleg deltok på NM for Ungdomsbedrifter nominert i kategorien sosialt entreprenørskap, heldt det første innlegget. Tre elevar frå Florø Vidaregåande skule, Njål Eliassen, Martin Ulsten og Viljar Ødelien, starta med å fortelje kva som inspirerte dei til å ta fatt på det enorme miljøproblemet med plast. Inspirasjonskjelda var prosjektet Precious Plastic, starta av nederlendaren Dave Hakkens, som fritt deler kunnskap og verktøy på nett som skal setje ein stopper for plastforureining. Der fann elevane mellom anna teikningar på to maskiner som dei har fått konstruert for å gjenvinne plast til ulike produkt, til dømes mobildeksel. Gode prosjekt kan, slik dei demonstrerer, også oppstå i møte med andre idéar og føre til positive ringverknader og arbeidsplassar andre stader, i India og Nkhotakhota i Malawi, der dei er involvert i samarbeidsprosjektet Green Plastic Nkotakhota.

Frukostsamling | Aksello
Ingrid Kassen, Norwell.

Norwell AS – lokal aktør i ei global verd

Administrerande direktør Ingrid Kassen frå eksportselskapet Norwell snakka om deira tette samarbeid med lokale oppdretterar og slakteri/pakkestasjonar for å møte krava til den internasjonale marknaden. Selskapet omset årleg ca. 25 000 tonn laks til ein verdi på ca. 1,2 milliardar kroner. I presentasjonen av bedrifta, kunne ho også avsløre at dei jobbar med spennande utviklingsprosjekt i kjølvatnet av marknadsendringar og nye, meir effektive maskiner for foredling av laks.

Frukostsamling | Aksello
Martin Ramsdal, Nekst.

Nekst AS – milepæl nådd og vegen vidare

 

Dette er på ingen måte ei månelanding, men det vi gjer er å ta i bruk teknologi på nye måtar.

– Martin Ramsdal

Det er gjerne ikkje ei månelanding for Nekst, men likevel eit stort steg for inkubatorbedrifta då dei endeleg fekk svar frå Fiskeridirektoratet om at søknaden deira for sjømerdar i Solund Kommune har komme gjennom nålauge. Partnar Martin Ramsdal hadde gleda av å fortelje meir om den gode nyheita på Frukostsamlinga i dag og gjekk nærmare innpå korleis sjømerdane skal fungere i praksis og saman med landanlegget planlagt på Botnastranda i Florø. Om prosjektet vert realisert slik dei planlegg med 16 konsesjonar, vil det bidra til 100 nye arbeidsplassar i fylket.

Frukostsamling | Aksello
Jan Olav Baarøy, Fredskorpset.

Fredskorpset – på lag med næringslivet

Ny direktør i Fredskorpset, Jan Olav Baarøy, tok turen frå Førde for å presentere «vår nye nabo» og korleis dei ynskjer å spele på lag med næringslivet. Dette gjer dei mellom anna gjennom å gi økonomisk støtte til utveksling mellom bedrifter i Norge og andre land i Asia, Afrika og Latin-Amerika. Fredskorpset ser at denne forma for kompetansedeling er veldig nyttig og lærerik for bedriftene, og oppfordra om å ta kontakt med dei om ein ynskjer å søkje om tilskot. Meir info om støtte til utveksling her.

Frukostsamling | Aksello
Jørgen Berg, Innovasjon Norge.

Ordet Fritt

Jørgen Berg frå Innovasjon Norge informerte om at Innovasjon Norge no gir tilskot til pilot og demonstrasjon for framtida sine havbaserte løysingar. Meir info om tilskotet og søknadsprosessen her. 

Neste Frukostmøte

Neste Frukostmøte vert torsdag 7. juni. Om du har forslag til tema og foredragshaldarar, så høyrer vi gjerne frå deg. Kontakt arne@aksello.no.

 

Ynskjer du invitasjon til vår neste Frukostsamling?

Meld deg på nyhendebrevet til Aksello her.

Gründersamling: Å skape si eiga bedrift

Onsdagskveld var det mange som tok turen til Gründersamlinga hos Aksello for å få med seg inspirerande foredrag frå erfarne gründerar som kunne dele frå sine gründerreiser, og fortelje om korleis ein skaper si eiga bedrift. Det var utruleg kjekt å sjå at her var både faste besøkande og mange nye fjes blant dei frammøtte.

Trainee Trine Vederhus og rådgjevar Heidi Felle starta samlinga med ein kort presentasjon av Aksello og korleis vi jobbar tett med gründerar og etablert næringsliv for å løfte fram gode idéar. Deretter gjekk det slag i slag mellom spennande innlegg og suksesshistorier frå ulike bedrifter i Sogn og Fjordane.

Askvoll Sjømat og Delikatesser

Første bedrift på programmet var Askvoll Sjømat og Delikatesser v/ Helge og Inger Johanne Loftheim. Dei er begge utdanna kokkar, og kunne fortelje at det var ein ferie til Askvoll, heimbygda til Leif, som vart starten på deira gründerreise. Medan dei var der forelska dei seg i eit gammalt, falleferdig hus som dei såg nytt potensiale i: nemleg ein delikatessebutikk. Saman med bror til Helge, Eirik som også er kokk, kjøpte dei huset, slutta i jobbane sine og forlèt storbylivet i Oslo for å bokstaveleg talt byggje si eiga bedrift. For opp i det heile hadde dei eit stort renoveringsprosjekt framfor seg, og det vart lange dagar der dei måtte balansere tida si mellom jobb i den lokale barnehagen, oppstart og oppussing.

 

Eg hugsa at vi var godt slitne og utbrente på opningsdagen, men vi klarte å nå målet vårt allereie på første opningsdag og det var tre fulltidsstillingar.

– Inger Johanne Loftheim


LocalHost og Lefdal Mine Datacenter

At du må ha «guts», og tørre å satse som gründer, kom også godt fram i Sindre Kvalheim sin engasjerande presentasjon om LocalHost og IT-eventyret Lefdal Mine Datacenter – Nord-Europas største datasenter. Sindre, som starta si første bedrift når han var 19 år gammal og hadde selt tre bedrifter i ein alder av 25, hadde mange erfaringar å dele. Mellom anna kor viktig det er å byggje seg opp eit godt nettverk, inngå samarbeid med dei rette personane og skape eit dyktig team.

Gründersamling | Aksello

Villa Åmot

Gode samarbeidspartnarar var også eit av mange viktige stikkord i Steinar Sørli sitt innlegg. Han presenterte reiselivskonseptet Villa Åmot som han har skapt saman med ektemannen sin Yngve Brakstad på sitt barndoms ferieparadis, tante Rollaug sin gard i Bygstad. Steinar snakka om lokalmat som lokal verdiskaping, internasjonalisering og deira samarbeid med the Travel Designer for å nå ut til high-end marknaden.

Vi gjer som tante Rollaug, ynskjer gjestane velkommen, og gir dei ei ekte og autentisk oppleving av Norge.

– Steinar Sørli

Gründersamling | Aksello

Sparebanken Vest

Kjell Gunnar Lilleøren frå Sparebanken Vest heldt også innlegg for å informere om midlar frå Næringsstiftinga i Sogn og Fjordane. Han fortalde mellom anna om kva dei ser etter, kva ein kan søke om og presenterte ulike suksesshistorier som dei har støtta. Stiftinga har nettopp hatt årets første søknadsrunde, og neste frist vert i september i år.

Gründersamling | Aksello

Mat og mingling

Kvelden vart avslutta med herleg mat laga av Askvoll Sjømat og Delikatesser og mingling. Vi håpar at alle gjekk heim med ny giv, inspirasjon og nye kjennskap! Det gjorde i alle fall vi, og vi ser allereie fram til neste samling.

Ynskjer du invitasjon til vår neste gründersamling?

Meld deg på nyhendebrevet til Aksello her.

Eit engasjert næringsliv vil skape ein sterk kystkommune

Kinn kommune var tema for Frukostsamlinga 5. april og Rolf Bjarne Sund frå Kinn kommune og Øyvind Reed frå Måløy Vekst trakk fram engasjement frå næringslivet som ein viktig nøkkel for å skape ein sterk kystkommune.

Men før innlegga kunne begynne hadde Sparebanken Sogn og Fjordane med ei overrasking til Aksello, ei gåve på kr. 150 000 kr.

Gjennom frukostmøte har de skapt ein viktig møteplass for næringslivet der dei kan komme å bli kjent med kvarandre, finne nye kundar og leverandørar og få inspirasjon. Vi ynskjer å heie dykk fram i det gode arbeidet som de gjer slik at de kan fortsette med det som de er flinke på og få sterkare musklar til å jobbe nord-, sør- og innover, sa Jan Nordem Knudsen, som overrekte gåva på vegne av banken.

Dagleg leiar Lone Bareksten takka så mykje for gåva som Aksello set umåteleg stor pris på. Vi er i vårt 5 år med frukostmøter og vil halde fram med det månadlege morgonritualet vårt som vi ser har blitt ein viktig møteplass for eit nyskapande næringsliv.  

–  No håpar eg det vert høgare smørbrød på neste frukostmøte, spøkte Rolf Bjarne Sund som heldt frukostmøtet sitt første innlegg.

frukostsamling aksello

Kinn kommune v/ prosjektmedarbeidar Rolf Bjarne Sund

Sund var den første tilsette i Kinn kommune og kunne fortelje at å jobbe med kommunesamanslåinga er den mest morosame jobben han har hatt så langt i si karriere.

– Det er ein artig, krevjande og kompleks prosess, men her er mange moglegheiter for samfunns- og næringsutvikling i Kinn kommune, påpeika han.

Sund presenterte korleis dei no arbeider med organiseringa av den nye kystkommunen med fellesnemnd, rådmann Terje Heggheim og ulike utval som skal føre kommunen på rett kurs fram mot kommunesamanslåinga 01.01.2020. Han la vekt på at Kinn kommune ynskjer å vere ein aktiv utviklingsaktør og oppfordra næringslivet til å ta kontakt.

Om vi skal leggje til rette for næringsutvikling, så treng vi innspel frå dykk. Sit ikkje i ro, men ver med og delta. Vi ynskjer at de tek kontakt med oss og er med å påverke det som skal skje framover, oppfordra han.

Blant utvala dei har oppretta har eitt av dei ansvar for “Næringsutvikling, næringsselskap, hamn, KF og eigarskap”. Øyvind Reed som er styreleiar i Måløy Vekst sit i dette utvalet og var med på samlinga for å fortelje om korleis det nye næringsselskapet i Måløy vil jobbe med utvikling og vekst i framtida sin kystkommune.

Frukostsamling Aksello
Rolf Bjarne Sund, Kinn kommune

Måløy Vekst v/ styreleiar Øyvind Reed

Dei to næringsselskapa i Kinn kommune, Aksello og Måløy Vekst, vil ha eit tettare samarbeid for næringsutvikling i regionen vår, og frukostmøte var såleis ei god anledning for dei frammøtte til å bli betre kjend med nye Måløy Vekst. Tidlegare dagleg leiar for Nordfjord Vekst, Randi P. Humborstad, som vi og kjenner frå Stadt skipstunell-prosjektet, er tilsett  som dagleg leiar for Måløy Vekst, og selskapet har fått eit heilt nytt styre. Styreleiar Øyvind Reed fortalde om modellen til selskapet og korleis dei ynskjer å arbeide for å skape vekst og engasjement på kysten. 

Lokalt engasjement er avgjerande for at vi skal lykkast og vi ynskjer at flest mogeleg engasjerer seg, understreka Reed.

For å få til dette har dei organisert Måløy Vekst i ulike underutval ut i frå forskjellege bransjar: Handel/Turisme, Marine/Maritime, IKT, Prosess og industri, og sal og marknadsføring.

–  Slik kan kvar enkelt jobbe med det dei brenn for og vi kan dele kompetanse på tvers av dei ulike industriane vi jobbar i og lære av kvarandre, forklarte han.

Ei anna spennande satsing er Måløy marine ressurssenter, eit lokalt forankra forsking- og utviklingsmiljø, som samarbeider tett med næringslivet i utvikling av nye produkt.

Frukostsamling Aksello
Øyvind Reed, styreleiar for Måløy Vekst

Reed avslutta sin presentasjon med å snakke litt meir om det samarbeidet Måløy Vekst og Aksello ser føre seg i framtida. Dialogen er allereie i gang og dei ser at Aksello kan bidra sterkt til gründermiljøet i Vågsøy med sin førstelinjetenesete og inkubator.

– Vi ser at vi treng kompetanse og ressursar for å fange opp gode idéar og gründerar i startfasen og hjelpe dei gode prosjekta eit steg vidare. Her har Aksello eit godt opparbeida miljø og kompetanse som vi kan dra nytte av, fortalde Reed.

– Vi er to forskjellige selskap som kompletterer kvarandre godt. Eit eksempel er satsinga på FoU i næringslivet der Måløy Vekst no er i full gang med realisering av MMR (Måløy Maritime Ressurssenter). Vi kan lære mykje av den kompetansen som dei sit på, så dette samarbeidet ser vi verkeleg fram til, avslutta Bareksten på vegne av Aksello.

Ordet Fritt

Under Ordet Fritt minna Øyvind Østrem frå Høgskulen på Vestlandet om at søknadsfristen for å søkje studieplass hos dei er 15. april. Hjelp dei gjerne å spreie ordet!

Aksello inviterer til Gründersamling hos oss 11. april. Mål for kvelden er å bidra til inspirasjon, motivasjon og nettverksbygging blant gründerar og idéskaparar i vår region. Etter presentasjonane blir det god mat og mingling! Samlinga er gratis og open for alle – og du kan melde deg på her.  

Maritime Forening Sogn og Fjordane arrangerer nettverkssamling for næringsaktørar som arbeider for verdiskaping i havrommet 18.-19. april. Nettverkssamlinga arrangerast på Kviknes hotel i Balestrand og er open for alle verksemder, ikkje berre dei som er medlem i Maritim Foreining Sogn og Fjordane. Meir info her.

Neste Frukostsamling 3. mai

Neste Frukostsamling vert 3. mai. Om du har innspel til tema du vil vi skal ta opp eller har tips til interessante foredragshaldarar, kan du tipse dagleg leiar Lone Bareksten på lone@aksello.no.

Vi sjåast på neste Frukostsamling!

Nytt kapittel for Pelagia-anlegget sikrar viktige arbeidsplasser

Global Fish har inngått avtale om kjøp av Pelagia sitt anlegg i Gunhildvågen i Florø. Det markerer slutten på eit langt arbeid, der vi i Aksello har bidrege saman med ordførar Ola Teigen.

Etter at Pelagia i oktober 2016 tok si avgjerd om å legge ned aktiviteten ved anlegget i Florø, ga Flora kommune i oppdrag til Aksello å skaffe ny aktivitet til anlegget.

– Vi kan ikkje sitte stille og sjå på at 50-60 arbeidsplassar berre forsvinn ut av vår kommune over natta, sa ordførar Ola Teigen den gong.

Aksello har hatt kontakt med mange potensielle kandidatar, innanfor havbruk, kvitfisk og anna havromsaktivitet. Steinvik Fiskefarm peika seg tidleg ut som ein god kandidat, og dei inngjekk ein intensjonsavtale i 2017. Denne vart imidlertid aldri realisert, og då måtte ein gå vidare med andre kandidatar.

– Løysinga med Global var ikkje blant dei vi jobba med, i og med at pelagisk verksemd var «no-go». Men når Pelagia og Global no er einige, skal vi berre vere glade for at anlegget no vert tatt i bruk igjen, seier seniorrådgjevar Arne Olsen i Aksello, som har leia arbeidet frå Aksello si side, og legg til:

– 50 nye arbeidsplassar er ikkje noko å kimse av i våre dagar. Og lokale eigarar, lokal verdiskaping, og store ringverknadene i form av bygningsmessige arbeider, andre forsyningar, hamneavgiftar og ikkje minst sal av vatn er alle faktorar som gjer at vi trygt kan seie: «Ei skikkeleg god løysing».

 

Frukostsamling 5. april

Aksello ynskjer alle velkommen til ny Frukostsamling den 5. april. Frukost og kaffe vert som vanleg servert frå kl 07.30; og innlegg frå kl. 08.00 til 09.00.

Tema for samlinga er Kinn kommune og vi kjem med fleire detaljer på Facebook når vi nærmar oss frukostmøte, så følg med her. 

Samlinga finn stad i Aksello sine lokaler i Magnus Thingnesgt. 1, 4.etasje (Kvartalet).

Kom og høyr, diskuter og treff gamle og nye kjende!

 

– Dette ynskje har eg hatt i to år

Ingvild Andersen seier at fylket vårt er verdsleiande når det kjem til mangfald og verdiskaping i næringslivet, men det er det mange som ikkje veit. Ho lærer stadig noko nytt om ting som skjer i fylket, og har lyst til å vite meir. No reiser ho på næringsturné for å bli betre kjend med næringslivet i Sogn og Fjordane. Første stopp er Aksello.

– Dette ynskje har eg faktisk hatt i to år. Sidan eg begynte i jobben min i Fylkeskommunen har eg hatt lyst til å reise på ein næringsturné for å bli betre kjend med næringslivet i Sogn og Fjordane, fortel Ingvild, rådgjevar for nærings- og kulturavdelinga til Sogn og Fjordane fylkeskommune.

Ingvild er opphavleg frå Oslo, har ein mastergrad i Innovasjon og Entreprenørskap får NMBU, og har tidlegare jobba som butikksjef for Norrøna. Då ho bestemte seg for å flytte til Sogndal i Sogn og Fjordane var det først og fremst naturen som lokka.

– Å kunne kombinere naturopplevingar med jobb var noko eg verkeleg hadde lyst til, seier ho.

Saman med kjærasten hadde ho besøkt Sogndal sommar og vinter for å sykle og stå på ski. Dei var sikre på å treffe mange andre med same interesser om dei flytta dit. Alle dei relevante jobbmoglegheitene kom derimot som ei positiv overrasking.

Verdsleiande næringsliv                                                                     

Jobbmoglegheitane i Sogn og Fjordane er noko vi må snakke meir om. Alt for få kjenner til at fylket er verdsleiande på fleire område i næringslivet. Og dessutan vil du som tilsett i ei bedrift her få meir ansvar og meir fagleg tyngde raskare enn i ei tilsvarande stilling i byane, understrekar ho.

For ei veke har Ingvild bytta ut kontorplassen sin i Leikanger med kontorplass hos Aksello for å bli betre kjend med næringslivet på kysten.

– Eg møtte Pixelwerk for første gang i dag og blei imponert over omfanget av oppgåver dei kan løyse med sin softwareutvikling. Dei begynte for nokre få år tilbake som eit fullproduksjonsselskap innan digitale, interaktive medieløysingar, design og såkalla «augmentet reality», men har no fått auga opp for havbruksnæringa og utviklar skreddarsydde verktøy til store kundar i denne bransjen, fortel Ingvild.

Angrar ikkje eit sekund

I tillegg til Pixelwerk har ho også besøkt elevar på Flora Vidaregåande skule som har entreprenørskap som valfag, NHO Vestlandet, og Maritim Forening Sogn og Fjordane. Før ho reiser heim rekk ho også ein tur til Fjordbase og INC Gruppen, og innimellom besøka er ho her på huset for å bli betre kjend med Aksello sine inkubatorbedrifter og gode naboar.

– Eg angrar ikkje eit sekund på at eg tok denne turen, seier ho entusiastisk og legg til: 

Det er utruleg verdifullt å komme seg ut og møte samarbeidspartnarar og bedrifter personleg og lære meir om kva det offentlege kan bety for dei og korleis vi kan vere gode hjelparar. Etter kvart håper eg å få moglegheit til å reise andre stader i Sogn og Fjordane for å sjå alt det spennande som skjer innan næringslivet i regionen vår.

Fylkeskommunen på besøk hos Aksello
Ingvild har bytta ut kontorplassen sin i Leikanger med kontorplass hos Aksello denne veka. F.v Vanja Viken, Lone Bareksten, Ingvild Andersen, Trine Vederhus og Arne Olsen.

Driftig

Som rådgjevar i nærings- og kulturavdelinga i Sogn og Fjordane fylkeskommunen har Ingvild mellom anna ansvar for nettsida Driftig som har som føremål å samle tilbodet til gründerar i Sogn og Fjordane. Gjennom dette initiativet arbeider Fylkeskommunen tett saman med kommunane, næringsselskap, inkubatorane og Innovasjon Norge. Saman ynskjer vi å fange opp gode idéar og initiativ og vere gode hjelparar for gründerar og nyskaparar i fylket vårt.