Måløy Vekst, Aksello og PwC inviterer til

Toppmøte i nye Kinn kommune mellom ordførarkandidatane og leiarar frå næringslivet

Analyse, innsikt, næringslivet sine innspel til politikarane, diskusjon og lunsj.

Agenda

  • Næringslivet i Kinn sine moglegheiter i nye Vestland
    Randi Humborstad, dagleg leiar Måløy Vekst
    Lone Bareksten, dagleg leiar Aksello
  • Næringsanalyse av Kinn
    Ingvill Flo, partnar PwC
    Terje Bjerkan, direktør PwC
  • Innlegg frå næringslivsleiarar: Slik kan politikarane skape dei beste rammene for næringslivet
  • Diskusjon og spørsmål frå salen

Praktisk informasjon

Dato: 13. mai 2019 kl 12.30 – 15.30
Stad: Parken Kulturhus på Raudeberg
Målgruppe: Alle interesserte
Pris: Gratis
Servering: Lett servering frå kl 12.30

 

13. mai er det 120 dagar til Kinn kommune vel sin fyrste ordførar. Desse kjem – kjem du?

Sindre Kvalheim, Localhost

Jon Edgar Johnsen, Måløy Byggservice

Agnar Lyng, Babord Group

Trond Inge Kvernevik, Onshore Farming Solutions (OFS)

Elin Tveit, Marø Havbruk AS

Erlend Toftesund, Saga Fjordbase

Linda Mortensen Midtbø, Flora Hamn

Jacob Nødset (V)

Ola Teigen (AP)

Morten Hagen (H)

Sissel Kongsvik (SP)

Frank Willy Djuvik (FRP)

Gustav Johan Nydal (KRF)

Geir Oldeide (R)

Odd Bovim (MDG)

Vi søkjer prosjektleiar innan havbruk

Søknadsfrist 01.05.2019
Har du erfaring innan havbrukssektoren og ønsker å arbeide i eit innovativt og spennande miljø? Då har Aksello ei stilling som bør interessere deg.
Aksello AS er eit innovasjonsselskap med hovudmerksemd på å skape og sikre arbeidsplassar på kysten av Sogn og Fjordane. Havbruk er ei næring for framtida, og vi ynskjer å styrke teamet vårt med ein erfaren medarbeidar innan dette viktige området.Første oppgåve blir å gjennomføre eit forprosjekt for meir samarbeid mellom havbruksaktørane i regionen, både mellom bedrifter, lokale styresmakter og akademia. Målsettinga er større verdiskaping, berekraftig utvikling og større sysselsetting i næringa.

Aksello etablerer no eit prosjekt for å legge til rette for dette. Til å leie arbeidet søker vi ein person med erfaring innan havbruk og kunnskap om offentleg forvaltning.

Arbeidsoppgåver:

Formulere og gjennomføre Havbruksprosjektet , inklusive:

·       Sikre deltaking i prosjektet frå relevante og gode aktørar.
·       Sikre samarbeid med eksterne partnarar nasjonalt og internasjonalt
·       Sikre finansiering til prosjektet sine ulike aktivitetar
·       Koordinere framdrifta i prosjektet og rapportere til finansierings­partnarar og andre
·       Framsnakke havbruksektoren og moglegheitene der i både interne og eksterne fora

Prosjektleiaren må rekne med å delta i løysing av oppgåver innan Aksello sine øvrige forretningsområde, som rådgjeving til inkubatorverksemder, arrangering av møteplassar osb.

Kven er du?

Vi søker ein person som:

·       Har høgare relevant utdanning
·       Har kunnskap og nettverk innan havbruksnæringa i Sogn og Fjordane
·       Har erfaring frå prosjektleiing
·       Har kjennskap til verkemiddelapparatet og offentleg sektor
·       Er resultatorientert og jobbar systematisk og godt – både sjølvstendig og saman med andre

Vi ser etter nokon som har kommersiell forståing og samtidig kan sjå havbruksnæringa frå lokale styresmakter sin ståstad, samt evne til å skape tillit og gode relasjonar.

Vi kan tilby:

·       Ei svært spanande og sjølvstendig stilling der du kan gjere ein stor skilnad
·       Stor kontaktflate mot næringslivet, offentlege styresmakter og andre
·       Innovativt miljø og moderne kontorlokaler i Florø sentrum
·       Konkurransedyktige vilkår, inklusive fleksitid og god pensjonsordning

Den første torsdagen i månaden vart som vanleg starta med ein god frukost etterfølgt av eit tettpakka program med fleire interessante foredragshaldarar hos Aksello.

Den første som fekk presentere seg var vår nye forretningsutviklar Frode Nybø som begynte hos oss 1. april. Frode vil vere ein viktig støttespelar for inkubatorbedriftene våre og skal hjelpe dei å lykkast med sine prosjekt. Han kjem frå ei stilling som prosjektleiar i Helse Vest IKT og har ein master i informasjonsteknologi frå Queensland University of Technology i Australia og ein master i prosjektleiing frå BI.

Bli betre kjend med Frode her

Frukostsamlinga vart sendt live, og du kan sjå streaminga her

Frukostmøte | Aksello
Aksello sin nye forretningsutviklar Frode Nybø

Hjelpemiddelsentralen (NAV) lettar bedriftenes rekrutteringsutfordringar v/Heidi P. Sårheim

Heidi P. Sårheim frå Hjelpemiddelsentralen var på frukostmøte for å presentere Hjelpemiddelsentralen sitt arbeid for eit inkluderande arbeidsliv.

– Det vi ofte høyrer frå menneske med funksjonsnedsetting er at dei ynskjer å vere som alle andre. Dei ynskjer å delta i samfunns- og arbeidslivet og på skulen akkurat som alle andre…Så vi jobbar med tilrettelegging både for dei som allereie er i arbeid og for dei som står utanfor.

Frukostmøte | Aksello
Heidi P. Sårheim frå Hjelpemiddelsentralen

Heidi påpeika at Hjelpemiddelsentralen er så mykje meir enn eit lager av kvite stokkar, rullestolar og talande ur. Dei er eit ressurs- og kompetansesenter, som i tillegg til rådgjeving og tilrettelegging i skule og arbeidslivet, tilbyr ulike tenester som tolk og mentorordning. Sentralen har også spisskompetanse på syn og høyrsel.  

Til slutt kom ho med eit spørsmål til arbeidsgjevarar og næringslivet om dei vil vere med å spele ball med Hjelpemiddelsentralen i inkluderingsdugnaden.

Frukostmøte | Aksello
Julian Udberg-Helle og Elias Myklebust Vaardal frå Ungdomsbedrifta Afrinvest

Ungdomsbedrifta Afrinvest førebur seg til NM v/Julian Udberg-Helle og Elias Myklebust Vaardal

Julian Udberg-Helle og Elias Myklebust Vaardal frå ungdomsbedrifta Afrinvest fortalde om korleis dei gir små mikrolån til bedrifter i oppstartsfasen i Uganda og Malawi.

Bedrifta har 12 tilsette og er ein del av blokkfaget i entreprenørskap ved Flora Vidaregåande skule. Skulen har over lang tid jobba med prosjekt Malawi, og det var gjennom dette arbeidet studentane vart gjort merksam på utfordringane med å ta opp lån. Mange har ikkje bankkonto eller ID-papir, og dei låna som vert tilbydd har høge renter og krav om oppstartskapital. I motsetning tilbyr Afrinvest mikrolån, utan oppstartskapital med lav rente, til berekraftige og framtidsretta prosjekt.

Julian og Elias trakk fram fleire eksempel på entreprenørar og bønder i Malawi og Uganda som med støtte frå Afrinvest har auka lokal matproduksjon, samt skapt ein arbeidsplass både for seg sjølv og fleire andre i lokalsamfunnet. Sidan desember i fjor har Afrinvest bidratt til at 20 personar har komme seg ut i arbeid, og ungdomsbedrifta skal delta i NM for Ungdomsbedrifter 2019 25. april.

Slik engasjement frå ungdommen vår lovar godt for framtida, og vi ynskjer dei lykke til under NM!  

Frukostmøte | Aksello
Øyvind Heimset Larsen frå Vestlandsforskning

Teknoløftet v/Øyvind Heimset Larsen, Vestlandsforskning

Øyvind Heimset Larsen frå Vestlandsforskning introduserte TEKNOLØFT-prosjektet som skal utvikle og styrke næringsretta forskingsmiljøa ved Høgskulen på Vestlandet og Vestlandsforsking for å auka kapasitet og kompetanse innan digitalisering, automatisering og big data. Gjennom dette prosjektet ynskjer dei å gjere FoU-miljø meir relevante for næringslivet i Sogn og Fjordane.

Jøril Hovland frå Kunnskapsparken er med på prosjektet for å sikre at tema og problemstillingar som det vert forska på er relevante og nyttige for næringslivet. 

– Har de ei problemstilling som de trur Øyvind og co. kan løyse, det kan vere big data, robotikk osv., så ta kontakt, oppfordra ho.

Inkubatorbedrifta Norwegian Seaweed Production mot gjennombrudd v/Svein Vindenes

Til slutt var det inkubatorbedrifta Norwegian Seaweed Production (NSP) og Svein Vindenes sin tur til å ta oss med til havrommet for å fortelje om korleis dei arbeider for ein meir bærekraftig hausting av tare. Taren er eit viktig råstoff for utvinning av alginat i medisinindustrien, og Norwegian Seaweed Production har fått tilgang til 30 000 tonn som dei skal hente ut råstoff frå. Dette vil dei gjere på den naturlege måten, utan kjemikaliar, og i motsetning til det industrien gjer i dag, så vil dei bruke heile planten. 

– Vi har komme ganske langt på veg. Vi har fått god hjelp av Aksello og hadde nok ikkje vore så langt komne om vi ikkje hadde hatt dei medhjelparane undervegs, understreka Svein.

Vi er utruleg glade for å ha NSP i vår inkubator og ser fram til å følgje dei vidare.

Frukostmøte | Aksello
Svein Vindenes frå inkubatorbedrifta Norwegian Seaweed Production

Ordet Fritt

Under Maritime Forening Sogn og Fjordane si nettverkssamlinga vart det offentleggjort at dei i desse tider med samanslåingar skiftar namn og Lone Bareksten, dagleg leiar i Aksello, inviterte Maria Brandsøy og Kristin Svardal til å gi ein kort presentasjon av nye Hub for Ocean.

Under Ordet Fritt vart det også minna om kor viktig det er med rekruttering til fylket. Høgskulen på Vestlandet har søknadsfrist 15. april, og Øyvind Østrem frå HVL kom med ein førespurnad til bedrifter om å dele bodskapet gjennom sine kanalar.

Linda Hovland frå Framtidsfylket snakka kort om korleis dei arbeider for å rekruttere folk til fylket gjennom å vise fram næringslivet og fortelje dei gode historiene. Ho minna om kor viktig det er med tilbod om sommarjobb for å knytte til seg studentar i eit meir langsiktig rekrutteringsperspektiv, og så langt i år har dei lyst ut 460 stillingar gjennom sin portal. Sjekk ut Framtidsfylket her.

Ingvar Torsvik Myrvollen, assisterande fylkessekretær for Vestland Høgre, informerte om at Næringsminister Torbjørn Røe Isaksen kjem til fylket på Næringsdagane 2019. I samband med dette vil han også besøke Florø der han planlegg eit SMB-kontaktmøte. Meir info kjem.

Neste frukostsamling er torsdag 2. mai, og det vil som alltid vere gratis og opent for alle som ynskjer å delta.

Meld deg på nyheitsbrevet vårt her, og få invitasjon direkte i din innboks!

Aksello inviterer til ny Frukostsamling torsdag den 4. april. Frukost blir som vanleg servert frå kl. 07.30, og presentasjonar blir frå kl. 08.00 til 09.00.

Vi kan by på følgjande program:

  • Inkubatorbedrifta Norwegian Seaweed Production mot gjennombrudd v/Svein Vindenes
  • Ungdomsbedrifta Afrinvest førebur seg til NM v/Julian Udberg-Helle m.fl.
  • Hjelpemiddelsentralen (NAV) lettar bedriftenes rekrutteringsutfordringar v/Heidi P. Sårheim
  • Teknoløftet v/Øyvind Heimset Larsen, Vestlandsforskning
  • I tillegg blir det små snuttar med info om Nor Shipping, nytilsett i Aksello og anna

Frukostsamlinga finn stad i Aksello sine lokaler i Magnus Thingnesgt. 1, 4.etasje (Kvartalet).

Innovasjon Norge vil være til stades på Frukostsamlinga med Egil Henning Ytrøy. Han vil også være tilgjengeleg for møter i etterkant. Om du vil ha eit separat møte med han, så send ei melding til arne@aksello.no.

VELKOMMEN TIL FRUKOSTSAMLING!

Vi har fått eit nytt tilskot til temaet vårt og 1. april begynner Frode Nybø som forretningsutviklar hos Aksello.

Han har dei siste fem åra jobba som prosjektleiar for Helse Vest – IKT sine regionale prosjekt i region Vest og ser fram til å bli ein del av Aksello sitt nyskapande miljø.

– Det skal bli stas å bidra til vekst langs kysten og i fylket elles. Eg gler meg til å hjelpe verksemder med å lykkast med sine prosjekt, fortel han.

Som forretningsutviklar hos Aksello skal Frode ha tett oppfølging av inkubatorbedriftene og rettleie dei gjennom heile prosessen frå forretningsidé til marknad.

– Frode har eit brennande engasjement for nyskaping og ein solid bakgrunn i prosjektleiing. Han er ein dyktig teambyggjar og har god erfaring med tidleg pilotering og testing som er viktige suksessfaktorar for prosjekt i utvikling. Vi trur han vil vere ein veldig bra match for våre inkubatorbedrifter, og bidra til at dei når sine mål raskare, seier dagleg leiar Lone Bareksten.

Frode har ein master i informasjonsteknologi frå Queensland University of Technology i Australia og ein master i prosjektleiing frå BI. Han har ellers hatt ulike roller i Finansdepartementet og konsulentfirmaet CapGemini, inkludert prosjektleiar og konsulent. Frode var også ein av totalt 32 i heile landet som blei plukka ut til NFF UEFA-A lisens 2018/19, og mange kjenner han nok som den nye trenaren for Florø Fotball.

– Ja, det er jo veldig mange som vil prate med meg om fotball, men eg håper det vil vere heilt andre ting som er i fokus hos Aksello når folk kjem innom for å snakke med meg, smiler han.  

Frode vil jobbe fulltid som forretningsutviklar utanfor sesong, og 70% når fotballsesongen begynner for fullt.

Team Aksello: Frå venstre seniorrådgjevar Arne Olsen, inkubatorleiar Vanja Viken, dagleg leiar Lone Bareksten, forretningsutviklar Frode Nybø og rådgjevar Heidi Felle.

Har du ein idé eller eit prosjekt som du vil realisere

Vi står klare til å hjelpe deg med etablering og utvikling av eiga bedrift og innovasjon i etablert næringsliv.

Kontakt oss

Den 28. februar møtte eit 40-tals havbruksaktørar frå heile fylket til møte hos Aksello. Det følgjande er eit kort referat og ei lita oppdatering.

På agendaen stod Høgskulen på Vestlandet si havbrukssatsing, Fagskulen sine tilbod, status for det nye Måløy Marine Ressurssenter samt Aksello sitt Havbruksprosjekt.

Høgskulen var representert både ved Øyvind Østrem frå det lokale havteknologistudiet og Mohn-senteret i Bergen. Øyvind orienterte om Høgskulen si utviding frå reint petroleumsstudium (subsea/undervannsteknologi) til det nye havteknologi-studiet. Der kan studentane velje undervegs om dei vil fokusere på olje eller akvakultur (eller noko i mellom). Oppdrettsnæringa sette pris på at det blir fleire studieplassar innan havbruk, men understrekte at dette er eit teknologi-studium, og at teknologane ikkje må gløyme biologien.

Mohn-senteret, eit underbruk av Høgskulen, orienterte om KABIS-prosjektet (Kapasitetsløft for Berekraftig og Innovativ Sjømatproduksjon). Med tunge partnarar i næringa vil dei forsterke og målrette havbruksorientert forsking og høgare utdanning på Vestlandet, med særleg vekt på miljøvenlege oppdrettssystem. Førebels har dei fokus på Hordaland, men det vil være naturleg at dei også inkluderer Sogn og Fjordane i framtida.

Fagskulen ved Reidar Grønli kunne fortelje at dei no jobba mykje tettare med Høgskulen, og at studentane kan gå saumlaust frå Fagskulen og inn i havteknologistudiet.

Måløy Marine Ressurssenter (MMR) ved dagleg leiar Roger Bergset ga ein status på etableringa av senteret. Prosjektet er monaleg redusert sidan dei opprinnelege planane, men eigenkapitalen er no meir eller mindre i boks. Dei jobbar no med rekruttering av personell og den fysiske etableringa av senteret. Samarbeidsavtalar er også viktige, og dei legg mykje vekt på å bli kjent blant internasjonale partnarar. MMR ønsker velkommen lokale aktørar som brukarar av senteret, og spesielt når MMR om få år blir ein godkjent forskingsinstitusjon.

Til slutt var temaet det nye Havbruksprosjektet i regi av Aksello. Arne Olsen ga ein statusrapport, og orienterte m.a. om løyvingane frå Flora kommune, Sparebankstiftinga Sogn og Fjordane og Sogn og Fjordane fylkeskommune, som gjer at forprosjektet no kan starte. Mest kritisk no er rekruttering av prosjektleiar, der Aksello er i dialog med ein god søkarar. Det vart understreka av møtedeltakarane at kvaliteten på prosjektleiaren ville bli viktig, med god kompetanse og godt nettverk i næringa. Forprosjektet vil konkretisere dei tema som prosjektet skal fokusere på, og allereie i møtet kom det opp eitt: rekruttering til næringa. Dette er i dag ei utfordring, og noko som aktørane i næringa kan løyse betre i lag enn kvar for seg.

I møtet vart det satt ned ei prosjektgruppe som skal støtte prosjektleiaren. Gruppa har representantar frå oppdrettarane, lakseeksportørane, leverandørindustrien, fylkeskommunen og Høgskulen.

Oppdatering:

  • Etter møtet har det kome mange fleire forslag til tema som forprosjektet må ta inn: fellesprosjekt innan lukka oppdrett, samfunnsrekneskap for næringa, kompetansesenter for landbaserte anlegg o.a.
  • Rekruttering av prosjektleiar vil ta litt tid. Kandidaten vi hadde i kikkerten har valt å ikkje byte jobb. Aksello vil truleg lyse ut på nytt. Om nokon er interessert sjølv eller har forslag til kandidatar, er det berre å ta kontakt med lone@aksello.no.

Godt og variert program på dagens frukostsamling med fleire engasjerande presentasjonar der vi fekk bli betre kjend med høvesvis Saga Fjordbase og Innvandrarsenteret sine visjonar for framtida, Haptiq tok oss med inn i Mixed Reality si fascinerande verd, og Innovasjon Norge gav oss eit innblikk i kva prioriteringar dei har i 2019.

Sjå live-streaming frå frukostmøtet her

Saga Fjordbase: Baseoperatøren bur seg på nye oppdrag v/Erlend Toftesund

Erlend Toftesund, administrerande direktør ved Saga Fjordbase, heldt første innlegg. Han presenterte basen sitt plankart for framtida og korleis dei ser for seg næringsutvikling på basen.

Med over 550 tilsette og 60 ulike bedrifter jobbar dei saman med mange ulike aktørar for å skape nye moglegheiter på basen, mellom anna saman med Neptun, Equinor og Shell. På kartet peika han ut fleire spennande prosjekt innan hydrogen, biogass og havbruk, slik som Havlandet RAS-pilot på land, for å nemne nokre. Han var også innom unytta potensiale av marine lager.

– Vi er opptatt av å skape nye verdiar, gripe moglegheiter og leggje til rette for vekst saman med våre samarbeidspartnarar.

Slik ynskjer dei å halde fram med å lokke til seg fleire og store aktørar som PGS, noko dei lykkast med takke vere skreddarsydde løysingar. Ein viktig eigenskap som dei vil ta med seg vidare inn i den framtidige planlegginga.

Frukostsamling | Aksello
Saga Fjordbase v/Erlend Toftesund

Innvandrarsenteret i Florø: Kva gjer dei og kva betyr dei for lokalsamfunnet? v/Cecilie Udberg-Helle

Etter at asylmottaket vart lagt ned i fjor var det behov for å tenkje nytt om kva Innvandrarsenteret i Florø skulle vere i framtida, og på frukostmøte i dag var Cecilie Udberg-Helle til stades for å fortelje meir om det. Innvandrarsenteret har i dag 150 elevar og tre avdelingar, der asylmottaket er blitt erstatta av ei utvikling- og forskingsavdeling.

Senteret har gode skotsmål, 79% prosent av innvandrarane går ut i jobb eller vidare utdanning, og dei gjer det godt på integrering. Innvandrarsenteret har mentorstatus både nasjonalt og internasjonalt, og nyleg vart dei mentorkommune for São Paolo i Brasil.

Intensjonen til det framtidige Internasjonale Kinn Innvandrarsenter er å vere ein inspirator på integreringsfeltet. Dei vil byggje opp ein kunnskapsbasert integreringsplattform som går over fleire år, heller enn eit toårig introduksjonskurs, for å sikre at flest mogleg kjem seg ut i meiningsfylt arbeid. Her oppfordra Cecilie næringslivet om å komme på bana, og å ta i bruk dei ressursane som våre nye medborgarar kan tilby.

For integrering er ein tovegsprosess. Vi er heilt avhengige av lokalsamfunnet for å få dette til, avslutta ho og minna om Florøkonferansen 2019 10.-11. april.

Frukostsamling | Aksello

Haptiq AS: Spennande Florø-bedrift med sterk vekst v/Ståle Lund-Andersen

Neste på programmet var Haptiq, ei lokal bedrift som boltrar seg på verdsscena innan Mixed og Augmented reality. Dagleg leiar Ståle Lund-Andersen presenterte bedrifta, som hadde sin start her hos Aksello då han og Chester Laquian tok sats i fjor. Den gongen var dei tre, og i dag er dei totalt 17 tilsette med kontor i Florø,Oslo og Manila.

Ståle tok oss med på ei digital tidsreise frå den første nettsida sin spede start i 1990 til dagens teknologi der vi kan spele 3D spel på mobiltelefonen. Dette har opna opp nye jobbmoglegheiter ikkje berre innan gaming, men også ute i næringslivet der Haptiq står bak fleire imponerande prosjekt det siste året innan mange forskjellige bransjar.

– Vi vil ikkje snevre inn endå og går vidt ut for å finne dei bransjane det er mest guff i, understreka han.

Haptiq arbeider mellom anna med eit prosjekt for Sjukehusetaten der dei byggjer sjukeheim i Virtual Reality slik at sjukepleiarar kan teste ut utforminga av sin framtidige arbeidsplass. Slik kan ein gjere nødvendige endringar før bygging. Eit anna spennande prosjekt dei held på med er å «vekke opp» avdøde norske og historiske kjendisar og gi dei nytt liv i Oslo sine gater.

Det skal bli interessant å følgje med på kva Haptiq fyller arbeidsdagane sine med framover, og vi følgjer spent med.

Frukostsamling | Aksello
Haptiq v/Ståle Lund-Andersen

Innovasjon Norge: Prioriteringar i 2019 v/Kristine Kopperud Timberlid

Kristine Kopperud Timberlid frå Innovasjon Norge Vestland, avdeling Sogndal, avrunda dagens frukostmøte med å fortelje kva Innovasjon Norge tenkjer om 2019: nytt år og nye moglegheiter med friske midlar.

Dei har allereie snakka om å få fleire bein å stå på innan eksport, og vekst internasjonalt vil halde fram som ei viktig prioritering. Spesielt då med klimautfordringane i tankane, der eit grønt næringsliv med berekraftig vekst er i fokus. Det nye Vestland skal også vere havfylket, og skal vere best på banebrytande løysingar i havrommet. Her ligg Florø godt geografisk til, så det er mykje som skjer her på den fronten.

Frukostsamling | Aksello
Innovasjon Norge Vestland v/Kristine Kopperud Timberlid

Til slutt viste Kristine til Innovasjon Norge sitt arbeid med The Explorer, eit utstillingsvindauge for norske grøne løysingar og oppfordra grøne bedrifter om å registrere seg.

– Denne er mykje brukt internasjonalt, og her kan ein registrere grøne løysingar gratis og det er lågterskel.

Ordet Fritt

Kristin Svardal frå Maritim Forening Sogn og Fjordane informerte om to ulike arrangement på deira kalender:

Leverandørdag Equinor onsdag 13. mars der bedrifter kan møte sentrale personar I Equinor si leiing for informasjon og dialog. Meir info her.

Nettverkssamling i Førde 2. og 3. april. Her er det allereie 50 påmelde og nytt for denne gong er at Forum for grøn energi får ansvar for ein bolk i programmet (dag 2) med fokus på “berekraftig business”. Meir info her.

Neste frukostmøte er torsdag 4. april. Om du har forslag til tema eller bedrifter, ta gjerne kontakt med oss.

Aksello inviterer til ny Frukostsamling torsdag den 7. mars. Frukost blir som vanleg servert frå kl. 07.30, og presentasjonar blir frå kl. 08.00 til 09.00.

Vi vil presentere eit rikhaldig program:

  • Haptiq AS. Spennande Florø-bedrift med sterk vekst v/Ståle Lund-Andersen
  • Saga Fjordbase. Baseoperatøren bur seg på nye oppdrag v/Erlend Toftesund
  • Innvandrarsenteret i Florø. Kva gjer dei og kva betyr dei for lokalsamfunnet? v/Cecilie Udberg-Helle
  • Innovasjon Norge. Prioriteringar i 2019 v/Kristine Kopperud Timberlid

Frukostsamlinga finn stad i Aksello sine lokaler i Magnus Thingnesgt. 1, 4.etasje (Kvartalet).

Kristine frå Innovasjon Norge vil være til stades utover dagen, og er tilgjengeleg for møter i etterkant. Om du vil ha eit separat møte med ho, så send ei melding til arne@aksello.no.

VELKOMMEN TIL FRUKOSTSAMLING!

Torsdag den 28. februar har Aksello invitert eit 50-tals aktørar frå havbruksnæringa i Sogn og Fjordane til stort møte i Florø. Der vil deltakarane komme tettare på Høgskulen på Vestlandet si havbrukssatsing, Fagskulen sine tilbod og det nye Måløy Marine Ressurssenter.

I tillegg blir det «kick-off» for eit nytt, stort havbruksprosjekt støtta av Flora kommune, Sparebankstiftinga Sogn og Fjordane og Sogn og Fjordane fylkeskommune. Prosjektet skal bidra til å løyse den store utfordringa:

Korleis få enda meir verdiskaping og sysselsetting i havbruksnæringa i regionen?

Vi har allereie mykje bra innan næringa, men kan vi bli betre på ting som:

  • Vidareforedling
  • Innovasjon, forsking og utvikling
  • Logistikkløysingar
  • Nye artar innan akvakultur
  • Nye råvare-kjelder
  • Nye/betre utdanningar og studier, og fleire studentar
  • Rekruttering av kompetanse og personell
  • Globalisering
  • og meir?

Svaret ligg truleg mange stadar, mellom anna i eit betre samarbeid mellom næringsaktørane, og mellom dei og lokale myndigheiter, investorar og akademia. Og kanskje meir samlokalisering; skal vil etablere eit «Laksens hus»? Og korleis skal vi ha gode partnarskap med andre aktørar langs kysten, som til dømes dei nye Katapult-sentra både nord og sør for oss?

Prosjektet startar med eit 6-månaders forprosjekt. Aksello vil stille til rådvelde ein prosjektleiar, og det er venta at aktørane vil sette ned ei prosjektgruppe med representantar frå dei ulike bedriftene og organisasjonane som skal delta på møtet den 28.

Dette blir spanande!

Førre veke deltok Aksello og tre av våre inkubatorbedrifter på DEMO DAY i Bergen for å byggje relasjonar på tvers av fylkesgrensene og møte potensielle investorar og samarbeidspartnarar. Over 50 selskap fekk pitche sine idéar for investorar i regionen, og tre av dei var inkubatorbedriftene våre Dimeq, Evoy og FjordAlg.

– Det var eit veldig høgt nivå på bedriftene som deltok, og inkubatorbedriftene våre leverte. Dei har alle tre komme veldig langt i utviklinga av sine prosjekt, og då betyr det så klart mykje for dei å få moglegheita til å delta på ein slik arena der hensikta er å kople gründerar saman med investorar, fortel dagleg leiar Lone Bareksten, som representerte Aksello under arrangementet.

 

DEMO DAY | Aksello
EVOY

ENERGY

Kvar bedrift hadde fem minuttar kvar til å presentere seg og dagen var delt opp i fire ulike sessions. Evoy var første ute i elden av våre i bolken Energy, og gründer Leif Stavøstrand viste korleis dei planlegg å eliminere utslepp frå båtar på verdsbasis med elektrisk framdrift.

– Det var ei ære å bli plukka ut til å vere med på dette blant så mange andre dyktige selskap frå heile Norge. Det var veldig kjekt, og vi møtte mange som det skal bli interessant å snakke vidare med, seier Stavøstrand.

Les også: – Blant 500 startups frå heile verda var det 11 som skilte seg ut. Ein av dei var Aksello si inkubatorbedrift Evoy

 

DEMO DAY | Aksello
DIMEQ

OCEAN

Dimeq og FjordAlg deltok i kategorien OCEAN. Dimeq presenterte sitt digitale armband som kan redde liv på sjøen, og FjordAlg sin produksjon av mikroalgar i lukka system på land.

Etter presentasjonane var det gjort klart eit mingleområde der dei ulike selskapa stod på stand og kunne komme i kontakt med potensielle interessentar.

– Arrangementet var veldig bra og mange interessante bedrifter pitcha i løpet av dagen. For vår egen del så synes eg at presentasjonen av Dimeq gjekk fint, men då vi stod på stand var det vanskeleg å identifisere kven investorane var. Vi kom dessverre ikkje i kontakt med investorar under minglinga, men vi får berre håpe at nokon av dei tek kontakt med oss på eit seinare tidspunkt, seier ein optimistisk Audun Bakken frå Dimeq.

Gabriel Ossenkamp frå FjordAlg seier seg einig i Dimeq sitt resonnement:

– Med over 50 bedrifter som deltok vert det nok mykje å ta inn for dei som sat i salen, men sjølv om vi reiser heim utan ei konkret avtale, så er det i alle fall fleire som veit om oss. Så håpar vi så klart at vi høyrer frå nokon som var der. Uansett så kjem vi til å jobbe vidare med å perfeksjonere pitchen til neste sjanse byr seg. For ein kan alltids bli betre, og øving gjer meister som dei seier, smiler han.

 

 

Les også: – Verda venter

 

FRAMTIDIGE VESTLAND

DEMO DAY var arrangert for andre gong, og det var første gong Aksello deltok med bedrifter frå vår inkubator. Arrangementet var i regi av VIS (Tidlegare Bergen Teknologioverføring) i samarbeid med fleire sentrale partnarar innan nyskaping i Norge, mellom anna SIVA, Innovasjon Norge, Connect Norge, og regionale næringslivsselskap som Aksello og Kunnskapsparken Sogn og Fjordane.

– Vi er avhengig av å styrkje miljøet vårt på tvers av fylkesgrensene og spele saman med dei gode kreftene som finst i Hordaland. Dei har bygd opp eit solid miljø og nettverk av businessangels og investorar som vi kan lære mykje av i Sogn og Fjordane. Så det er utruleg viktig at vi får til gode samarbeid med dei, og spesielt med tanke på framtidige Vestland, konkluderer Bareksten.

 

 

DEMO DAY

Hensikta med DEMO DAY er at lovande selskap som er på jakt etter nye samarbeidspartnarar eller investorar får vist seg fram på ein 5-minuttars presentasjon. VIS (tidlegare Bergen Teknologioverføring) har over 100 selskap i porteføljen sin, og i 2017 bestemte dei seg for å lage eit ordentleg konsept for ein slik dag. Det vart ein stor suksess. Som i fjor, samarbeider dei med fleire aktørar som til dagleg jobbar opp mot ulike innovasjons og investeringsmiljø:

DNB, Innovasjon Norge, Connect Norge, Sparebanken Vest, VIS, NCE Media, NCE Seafood, NCE Finance Innovation, GCE Ocean Technology, NCE Maritime CleanTech, X, Innoventus Sør, Startup Lab, Kunnskapsparken Sogn og Fjordane, Inven2, SINTEF, Atheno, Industriutvikling Vest, Bergen Works, Accel og Aksello.

Meir info om DEMO DAY